Lluis Antón González

El teatru foi de siempres una forma de cultura, representando a los pueblos onde surde, les sos formes, idees y maneres d´entender el mundu. Hestóricamete n´Asturies, como nel restu de los pueblos, faciénse representaciones pa tratar de desplicar el so universu, los sos misterios. La representación xestual y mímica, anterior a la pallabra, foi la primera forma de comunicación humana. Esta caltiénse entá güei nes nuestres formes cotidianes d´espresanos. Asina son como surden les primeres dances rituales, que nel casu d´Asturies entá se conserven dientro del nuestru folklor. El corri-corri, La danza prima, El pericote… son auténtiques representaciones de los tiempos proto-hestóricos, cuyu significáu escápasenos güei de les nuestres entendederes. Estes y otres que desconocemos serien les representaciones máxico-relixoses de la antigua nación Astur, que sobrevivieron, como otros munchos mitos y costumes  paganos, a la cristianización pero que perdieron el so significáu primitivu. Teatru, ritu y/o folklor nun dexa de ser una parte de la nuestra cultura na que ye necasario afondar nel so estudiu.

Hasta primeros del sieglu XX yeren mui populares les representaciones de sidros, guirrios, zamarrones, guilandeiros, bardancos y otres denominaciones. Esti teatru rural, aunque evolucionáu col pasu los sieglos y cristianizáu na forma, conserva dellos rasgos arcaicos, como´l vestise d´animales, y la so relación colos ciclos del calendariu solar. Ye perdificil saber cual ye´l so orixe y el momentu qu´incorporen dellos personaxes y la so relación cola comedia qu´estos grupos representaben. Esti ye un teatru de personaxes, prácticamente ensin testos, qu´improvisen sobre estructures organizatives mui elementales.

El primer escritor n´asturianu, del que tenemos conocencia, ye Antón de Marirreguera. Nacíu en Carreño p´hacia 1605, foi autor de númberoses obres poétiques, de les que solo se conserven unes poques, debio a que´ l mesmu mandó quemales. Ye tamién el primer autor teatral. La so obra L´ensalmador y los entremeses, recientemente recuperaos por Xulio Viejo, El alcalde y Los alcaldes, son les testos más antigüos conocios de lo que podemos denominar teatru nacional asturianu. Aunque tengamos la obra lliteraria, ye perdificil saber como se facia, y que popularidá tenia esti teatru. La distribución de la población, mayoritariamente  en pequeños núcleos, condicionaría al teatru popular asturianu. Les representaciones fariense nos pueblos polos grupos de guirrios igual que los autos navidiegos en feches mui determinaes.

A finales del sieglu XIX yeren mui populares les representaciones de grupos de teatru aficionáu que representaben obres n´asturianu sobre temes rurales.  A principios del sieglu XX  l´actor llangranu Pedro Granda  plantega crear un teatru asturianu mas “profesional”, pensando na esplotación de les amériques y la influencia económica de la colonia asturiana. Los centros asturianos, n´especial el de l´Habana, representarien y publicarien numberoses obres, munches d´elles perdies, que seria necesario rescatar como parte del nuestru patrimoniu cultural.  Les numberoses compañies asturianes, que con mayor o menor ésitu surdieron a partir de la idega  de crear un teatru asturianu, la popularidá d´autores como Eladio Verde, Antón de la Braña, Pachín de Melás, Pín de Pría,... y d´actores como José Manuel Rodríguez, Aurora Sánchez, Donorino García, Rosario Trabanco, Clara Ferrer,… ficieron d´esti teatru el más popular de l´Asturies del sieglu XX.

El paréntesi de la dictadura, fizo qu´esti teatru non evolucioanra, si non tolo contrario, aunque siguió gozando del apalusu del públicu. Nos años setenta del caberu sieglu, la xente mozo queriendo romper col pasáu da la espalda a tolo identitario asturiano, dexándose llevar por toles modes veníes de fuera. Los grupos, d´aquella llamaos independientes, nacíos nel posfranquismu renieguen de la llingua y cultura asturiana. Solo el grupu Telón de Fondo, fundáu nel añu 73, apostaría pola llingua asturiana como mediu d´espresión. Nel Amaro y Dolfu Camilo tamién  pela so parte trataron de contribuir dende´l trabayu en diversos grupos a la normalización del teatru n´asturianu. Dellos poetes asturianos, de la llamada xeneración del Surdimientu averáronse a la lliteratura  dramática. Llorienzu Novo Mier, Manuel Asur, los nomaos anteriormente Nel Amaro y Dolfu Camilo y sobre too Xuán Xosé Sanchez Vicente trataron de crear un nueva lliteratura teatral n´asturianu.

Otru capítulu aparte merecería falar sobre´l monólogu asturianu, una forma ancestral de representación teatral. Enllazáu col costumismu, polo rural de los sos temes y personaxes, intenta tamién renovase garcies a autores como Rubén Sanchez Vicente, Dolfu Camilo y la compañía Produciones Nun Tris.

¿Ye posible güei, casi cien años depués de la idega de Pedro Granda de crear un teatru asturianu dende un puntu de vista identitariu?  La rempuesta ye perdificil, y depende muncho d´unes condiciones sociales y polítiques que güei nun se dan. El teatru ya nun tien el pesu que tuvo nel pasáu. La pérdida de señes d´identidá pola falta d´un apoyu políticu, la incidencia de los modernos medios de comunicación, n´especial la televisión,  la marxinación de tolo identitario asturiano por parte de les instituciones, dibuxa un panorama prietu, non solo pal teatru asturianu, si non pal futuru de tola cultura asturiana. La pérdida de poder políticu, económicu y cultural de la que nun son ayenos los últimos gobiernos d´esti vieyu país, ponnos nuna situación delicada. Demientres l´asturianu garró prestixu y reconocimientu social nestos caberos 25 años, les medies entamaes pa la so recuperación siguen siendo insuficientes. La falta de la oficialización y la consiguiente normalización fai que la nuestra llingua, la más importante seña d´identidá,  tea en peligru de desapaición según el caberu informe de la UNESCO.

La necesidá antropolóxica de la representación fainos albidrar un futuru esperanzador aunque inciertu. El que nos pué convertir, nel más ampliu sentíu, n´espectadores o actores del nuestru futuru. El compromisu, la participación y la defensa del nuestru propiu puntu de vista fainse más necesarios que nunca nun mundu globalizáu. Ye posible nun futuru crear un teatru asturianu, con unes señes d´identidá propies. Ye posible y necesario pal futuru de la nuestra cultura y pal futuru del propiu teatru n´Asturies. Pa ello solo tienen que dase dalgunes condiciones de les que voi apuntar darréu:

—Un mayor apoyu institucional p´hacia el teatru nacional asturianu.

—Una escuela asturiana, averada a la nuesa realidá cultural, qu´apoye la investigación y el desarrollu de nueves formes teatrales y parateatrales.

—Un mayor interrelación ente los grupos y compañies asturianes.

—Unos autores, actores, dramaturgos etc., asentaos na realidá cultural asturiana, que representen la nuestra forma de ver el mundu, que partan de lo particular pa dir p´hacia lo universal.

—Un mayor riesgu creativu.

—Unos actores que nun ten pensando na emigración como únicu fin de la so carrera

—Un usu de la llingua asturiana, non solo na creación, na mayor media posible.

—Un mayor apoyu dende los medios de comunicación d´ámbitu asturianos.

—Un teatru que tien que ganase el apoyu d´un públicu asturianu, que se sienta identificáu como recientemente lo fizo (y lo fai) col teatru costumista.

El teatru asturianu de nun conseguir una identidá propia tará siempre pensando en Madrid. Será un teatru probe, provincianu y d´escasu pesu social. L´ésitu o´l fracasu del nuestru teatru va depender muncho del apueste que se faiga poles nuestres posibilidaes de crear un teatru con una personalidá propia. Eso va depender muncho de la voluntá de los asturianos de querer seguir siendo un país con una identidá propia o convertise nun barriu dormitoriu de Madrid.